Insomnia (lack of sleep)

Wetin be Insomnia

If pesin dey regularly struggle to find sleep, na im be say dem get insomnia be dat.

Most of di time dis problem dey get better if pesin change dem sleeping habit

How to check weda you get insomnia

• If e dey hard you to find sleep for night

• If you dey wake many times for night after you don sleep

• You just lie down, no fit close eye for night

• You dey wake up too early, no fit go back to sleep

• If you still dey tire after you wake from sleep

• Even wen you tire, you no fit sleep during di day and you no fit concentrate

• You dey tire during di day and any small ting dey make you vex
  

If you get any of dis problem regularly, na im be say you get insomnia be dat

How much sleep all man need?

Different pipo go need different amount of time to sleep

• Most baby and small pikin dem go need between 12-17 hours of sleep in one day

• Most children go need between 9-12 hours

• Most adult go need between 7-9 hours (but remember, some pipo fit need less dan dis and dem go dey kampe)

Wetin fit cause Insomnia?

• If pesin get stress or depression

• Wen noise no gree pesin sleep

• If room dey too hot or too cold

• Bed dey uncomfortable

• Alcohol or cigarette fit affect sleep

• If pesin dey abuse drug

• If pesin take long flight for aeroplane

• If pesin dey do shift work – like to start work for night finish for morning

Wetin you fit do if you get insomnia

Most of di time, insomnia go improve if pesin change dia sleeping habit, so e dey  important to do di following :

• Try go bed for night and wake for morning at di same time evri day

• Try relax for at least one hour before bedtime – you fit shower to help you relax

• Make sure you no get bright light for inside room.

• Di room suppose dark and quiet to help you relax. You fit use curtain or eye mask block any bright light

• Make you dey try do exercise during di day, so bodi go tire and ready for sleep

• Make sure say your mattress and pillow dey comfortable
  

Make you dey avoid:

• To smoke, drink alcohol, tea or coffee close to bedtime

• Chop heavy food for late night, close to bedtime

• To watch television or use your phone wen you dey inside bed or dey prepare to sleep. Di bright light wey dey shine from inside dis devices no o gree you sleep

• To sleep during di day

After you don try all dis method and you still no dey get correct sleep, you suppose talk to your doctor